Nəzərinizə çatdırırıq ki, Azərbaycan Minimal İnvaziv Cərrahlar Cəmiyyətinin 27.02.2021 tarixində keçirilmiş ikinci aylıq seminarında Covid-19 pandemiyası şəraitində planlı cərrahi əməliyyata gedəcək xəstələrin müayinə və müalicə olunmasına dair beynəlxalq mövcud protokollar ətraflı müzakirə edilmişdir. Cəmiyyətin idarə heyyəti və müxtəlif komitələrin üzvləri tərəfindən qərara alınmışdır ki, Avropa Endoskopik Cərrahlar Cəmiyyətinin mövcud olan protokolu Azərbaycan şəraitinə uyğunlaşdırılaraq üzvlərimiz və Azərbaycanda fəaliyyət göstərən klinikalar üçün əsas kimi götürülə bilər. Belə ki, burada Covid-19 testi verib pozitiv çıxmış, lakin heç bir kliniki əlamətləri olmayan xəstələrə, kliniki əlamətləri olan xəstələrə, Covid-19 keçirmiş xəstələrə hansı hallarda hansı müayinə alqoritmi tətbiq edilsin, hansı hallarda cərrahi əməliyyat təxirə salınsın, hansı hallarda hansı müddətdə icra olunsun bütün bu məsələlər çox qısa bir alqoritm şəklində verilmişdir. Düşünürük ki, cəmiyyətin üzvləri eləcə də planlı cərrahi fəaliyyət göstərən bütün klinikalar və orda çalışan həkimlər üçün bu çox səmərəli olacaqdır.
