Rəsmi elan və xəbərlərdən ilk xəbərdar olmaq üçün AMICC WhatsApp kanalına qoşulun:
11–12 iyul 2026-cı il tarixlərində Qusar şəhərində Azərbaycan Minimal İnvaziv Cərrahlar Cəmiyyəyinin növbəti konfransı keçiriləcək. Tədbirin əsas məqsədi müasir tibbi biliklərin paylaşılması, multidissiplinar əməkdaşlığın gücləndirilməsi, pasiyent təhlükəsizliyi və tibbi xidmətlərin keyfiyyətinin artırılması istiqamətində vahid peşəkar platformanın formalaşdırılmasıdır. Bu məqsədlə ölkənin tanınmış tibb mütəxəssisləri bir araya gələrək müasir tibbin aktual mövzularını müzakirə edəcək, təcrübə mübadiləsi aparacaq və praktiki bacarıqlarını inkişaf etdirəcəklər.
Tədbirin ilk günü Qusar şəhər Heydər Əliyev Mərkəzində keçiriləcək və canlı cərrahiyyə nümayişi, plenar iclaslar, elmi məruzələr və panel müzakirələri ilə yadda qalacaq. Proqram çərçivəsində minimal invaziv cərrahiyyə, elektrocərrahiyyə prinsipləri, kəskin pankreatitin idarə olunması, endoskopik cərrahiyyə, qanaxmaların idarə olunması və digər aktual mövzular üzrə çıxışlar təqdim ediləcək.
Tədbirin əsas hissələrindən biri AMİCC-in “Kəskin pankreatitin idarə olunması üzrə klinik rəhbərliyi”nin yekun müzakirəsi və qəbuluna həsr olunmuş ekspert paneli olacaq. Bu müzakirələr səhiyyə sistemində sübuta əsaslanan klinik yanaşmaların tətbiqinə və vahid müalicə standartlarının formalaşdırılmasına töhfə verəcək.
Konfrans çərçivəsində tibb bacıları üçün ayrıca elmi sessiya da təşkil olunacaq. Sessiyada pasiyent təhlükəsizliyi mədəniyyətinin gücləndirilməsi, əməliyyatxanada infeksiya və xəstə təhlükəsizliyi, maye balansının idarə olunması kimi praktik əhəmiyyət daşıyan mövzular müzakirə ediləcək.
12 iyul tarixində isə OKİ Hospital və Qusar Rayon Mərkəzi Xəstəxanasında praktiki təlimlər təşkil ediləcək. İştirakçılar lazer proktologiyası, cərrahi tikiş, CPR, traxeostomiya, endoskopiya və tibb bacıları üçün xüsusi praktik məşğələlərdə iştirak edərək nəzəri biliklərini praktik bacarıqlarla möhkəmləndirmək imkanı əldə edəcəklər.
Konfransın səhiyyə işçilərinin davamlı peşəkar inkişafına, regionlarda tibbi xidmətlərin təkmilləşdirilməsinə və beynəlxalq təcrübənin regionlarda tətbiqinə mühüm töhfə verəcəyi gözlənilir. Konfrans AR Səhiyyə Nazirliyi tərəfindən akkreditasiya ediləcəkdir.
2. KONFRANSIN PROQRAMI – (PDF)
4. ETŞ-in rəy forması (DTT balı) – (PDF) – tezliklə
Əlaqə: +994 99 342 81 81 / +994 99 310 32 05
Veb-sayt: www.amicc.az
