11-12 aprel 2026-cı il tarixlərində Şamaxı şəhərində Azərbaycan Minimal İnvaziv Cərrahlar Cəmiyyətinin (AMİCC) təşkilatçılığı ilə keçirilən 12-ci Regional Konfransı yüksək peşəkarlıq, interaktiv yanaşma və real klinik təcrübənin sintezi ilə yadda qaldı.
Konfransın əsas fərqi yalnız elmi məruzələrlə məhdudlaşmaması, cərrahiyyənin “canlı ritmini” iştirakçılara birbaşa hiss etdirməsi oldu. Açılışdan dərhal sonra təşkil olunan canlı cərrahiyyə seansı iştirakçılar üçün real əməliyyat prosesinin incəliklərini müşahidə etmək imkanı yaratdı və müasir minimal invaziv yanaşmaların praktik tətbiqini ön plana çıxardı.
Plenar iclaslar çərçivəsində cərrahiyyədə ən aktual problemlərdən biri olan cərrahiyyədə qanaxmaların idarə olunması müxtəlif aspektlərdən geniş müzakirə edildi. Aparıcı mütəxəssislər tərəfindən təqdim olunan çıxışlarda həm əməliyyatdaxili, həm də postoperasion dövrdə rast gəlinən ağırlaşmaların idarə strategiyaları, eləcə də multidissiplinar yanaşmanın əhəmiyyəti vurğulandı. Xüsusilə cərrah–radioloq əməkdaşlığının nəticələri və innovativ texnologiyaların rolu iştirakçılar tərəfindən böyük maraqla qarşılandı.
Günün ikinci yarısında keçirilən panel müzakirələri klassik konfrans formatından fərqli olaraq daha açıq, debat xarakterli mühitdə baş tutdu. Müxtəlif sahələri əhatə edən klinik halların analizi, fərqli yanaşmaların müqayisəsi və praktik qərarvermə mexanizmləri geniş auditoriyanın aktiv iştirakı ilə formalaşdı.
Bu konfrans bir daha göstərdi ki, müasir tibb yalnız bilik mübadiləsi deyil, həm də əməkdaşlıq, innovasiya və davamlı inkişaf platformasıdır. Şamaxıda keçirilən bu görüş regionlarda tibbi xidmətin keyfiyyətinin yüksəldilməsi və minimal invaziv cərrahiyyənin daha geniş tətbiqi istiqamətində mühüm addım kimi qiymətləndirilir.
Konfransa ev sahibliyi edən Şamaxı MRX başda Natiq Əliyev olmaqla bütün kollektibinə, fakültə üzvlərinə və əməyi keçən hər kəsə təşəkkür edirik